吹水
星期三, 3月 29, 2006
別以為吹水無用﹐今個星期我終於見識到吹水﹐小則可以解悶怡情抒懷﹐大則可以治國興邦安民。
事緣在星期一晚﹐獃在電視機前看有別稱"陳浩民密碼"的"人生馬戲團"﹐不用三分鐘已經令我"轉台衝動綜合症"發作。如是者按呀按呀﹐終於轉到一個後來翻查才知叫 "Decisions that Shook the World"的明珠台節目。
節目講緊有位仁兄﹐有唔知二流定三流戲子唔做﹐走去選總統又居然比佢選到。這位仁兄叫做列根﹐吾等吹水小輩﹐實應尊稱一聲叫佢做阿列根哥。
阿列根哥當選之後位都未坐暖﹐上至白宮群英下至草根小民﹐當正這位戲子總統當係西遊記主角陳浩民﹐即係睇你點做馬騮戲。片中一個幕僚憶述﹐成班WEST WING開會時﹐阿列根哥通常都縮在一角﹐常常用本黃色簿仔好似寫緊筆記﹐實際上無人知﹐亦無人會理他在寫甚麼東東﹐如廣東話話齋﹐當你透明。
在一次新聞廣播﹐阿列根哥以為仲係試緊咪﹐忍了很久的根本吹水性格終於按捺不住﹐笑笑口係咪前講話蘇聯係一個邪惡帝國﹐稍後就會同蘇聯開火死過﹐一於有你無我﹐今日同佢做忌云云。但係好衰唔衰﹐阿列根哥不知道其實直播已經開始﹐不單鬧出了一個大笑話﹐吹水唔抹嘴的形像更深入民心。
有一次成班位高權重的甚麼內閣大臣軍情總處三軍總司令等等﹐一起商量如何應付玩冷戰的蘇聯﹐仲要同要同蘇聯佬在核武方面鬥多﹑快﹑好﹑省﹑平﹑靚﹑正。阿列根哥繼續係本黃色簿仔都畫呀畫呀﹐可能係玩緊<天下太平>玩得太耐﹐突然間又再次發揮他吹水唔抹嘴的本色﹐同幕僚講不如起個保護罩啦﹐使鬼同佢鬥多﹐佢射幾多我就通通射番幾多下來﹐多都無用﹐幾好呀。因為阿列根哥之前三兩下散手﹐解決了航空服務員大罷工﹐大家都要比番兩分薄面佢﹐於是這個叫做"反彈道導彈戰略防禦計劃" (SDI-Strategic Defense Initiative) ﹐或者做佐治仔魯卡斯特約贊助的 "星球大戰計劃"﹐就此拍板去馬。
片中另一個幕僚在訪問中憶述﹐阿列根哥當時的想法相當大膽創新﹐天馬行空﹐潛台詞即是當年成班人都認為佢傻傻地﹐不切實際。另一個有份參與計劃的專家話﹐阿列根哥的構想﹐就算以今時今日的科技﹐亦無可能成功﹐加上實際撥下來的預算十分少﹐所以對這計劃從來不會寄予厚望。
但阿列根哥一於少理﹐去到日內瓦同戈爾巴喬夫水繼續吹﹐可能仲帶埋佐治仔幾套星戰同場加影﹐有咁大吹到咁大﹐嚇到亞戈佬一方面問阿列根哥唔好玩星戰得唔得﹐另一方面驚死蝕章自己又馬上大加軍費來抗衡。如上面所說﹐星戰計劃話就話前前後後計埋用了近千億美元﹐實際上真係吹下水野﹐所花無幾。但當時蘇聯在財政緊拙﹐仲要真金白銀大舊大舊拿出來同你玩﹐在此消彼長的情況下﹐結果是蘇共倒台﹐東歐變天。封阿列根哥做吹水之皇﹐真係不作他算啦。
下個星期一仲有最後一集﹐講羅斯福大戰希特拉﹐唔知有無幪面超人555咁好睇呢﹖
Posted byDark Knight at 12:00 上午
吹開又吹，星期四晚九點明珠台。
不過令你"轉台衝動綜合症"發作唔好怪我！
星期四晚九點明珠台?
你想講Man's Heritage: Snowflake a Gorilla's Story 定Tru Calling ?
唔係Man's Heritage，
又唔係Tru Calling，
不過唔識英俊哥可以唔睇
根本吹水 said...
唔係Man's Heritage，
又唔係Tru Calling，
不過唔識英俊哥可以唔睇
-
唔係Man's Heritage，
又唔係Tru Calling，
唔通你玩緊”陳浩文密碼“﹖
- 另﹐有人問為甚麼電視劇”人生馬戲團“又叫”陳浩文密碼“﹖
因為劇中兩條主線﹐除了宣傳大陸咩咩樂園之外﹐另外一條就是超低B版的”達文西密碼“。
明珠套野星期幾做架? 咁搞野既?
吹水密碼：
Pearl->SPECIAL